幾年前嘅一日，口水禧攞住一個裝lego嘅桶走嚟同我講：「呀！媽媽，我第日大個想做倒垃圾呀！」嗰陣時嘅佢，三歲。
唔知道一般人聽到自己嘅仔女同自己講佢第時大個想去倒垃圾會有咩反應呢？而我當時嘅反應咪就係笑囉，同埋叫佢要食多啲飯先有力舉起個垃圾桶倒垃圾架！講完佢重一隻手拎住個桶，另一隻手拎左個袋話係佢個公事包喎，同我講句：「我返工啦！」。過癮！
如果問我，假如將來佢真係去左做倒垃圾我會唔會唔開心，非常老實咁答你，我唔會。（講吖你，睇下到時你點！
）
如果你認同職業無分貴賤的話，只要子女有份正當職業，可以三餐溫飽，甚至養起自己頭家，最重要係佢返工返得開心的話，做乜野行業有咩問題？如果你嘅答案係我會唔開心的話，一係你就擔心佢揾黎都唔夠自己食，更莫講話夠埋父母食；一係你個人覺得嗰個行業好辛苦，你想仔女做一份你個人認為好歎嘅工；一係你個人認為份工無前途可言，無用嘅人先會去做嗰啲工；一係你覺得話比人知我仔女做XX好無面，驚人哋話你唔識教仔女，所以佢哋大個咁無用做啲咁嘅工；一係重有其他原因……
每個 人細個都總有一個「我大個想做乜」嘅諗法，大部份都同你長大之後真正做嘅職業完全無啦更嘅。我細個都有無數個「我大個想做乜」嘅志願，講出黎都覺得超低能同勁攪笑。
我曾經想大個做老師（大路野吖），因為細個見啲老師鬧人唔洗本，鍾意鬧就鬧，有咩工咁筍收錢去鬧人喎！而家先知，做老師原來都要硬食好多比人鬧比人投訴架！
曾經我想大個去賣雞蛋仔，因為可以一邊做黎自己食，一邊做黎賣。但無諗過日曬雨淋嘅問題，同埋學校放暑假我嘅生意額會有影響。
曾經我想做個藝術家（好窄！），覺得畫下野，設計呢樣嗰樣好有型。但唔知道賣大錢嗰啲藝術品通常係個藝術家釘左先會紅。
曾經我想做個鋼琴家（先天後天都無可能），因為細個學oral嗰陣覺得自己聽音快而準，我以為自己係perfect pitch。但忘記左鋼琴家首要條件係手夠大，手指夠長，重要記性好，你有幾何見過演奏家要睇琴譜表演？我啲記憶快則可以幾秒內唔記得之前入廚房想攞乜野，慢則可以住左十年嘅街有時都會轉錯路口！問你怕未！先天不足，後天更加無可能啦，日日淨係做功課都做都斷手咁濟，莫講話有足夠時間練琴。
最荒謬係曾經想做賽車手!!!!
，做唔到真係全宇宙嘅福氣！細個騎住架BMX衝落一條大斜路之後重生還嘅時候突然覺得自己有賽車嘅天份！
不過呢十年已證實我係無駕駛技術可言，因為揸咗十年車，我仍然唔識泊S位！
。其實由我考車牌嗰刻開始我就知道我呢世最好都係做乘客啦。
最終，我做左我從來都無諗過嘅職業 – 做人呀媽。
對比返上面成揪理想，係咪好大出入呢？所以話呢，細路仔嘅理想會成日變架，唔需要太過認真。口水禧已經轉左佢嘅理想啦……呢期佢話大個想做揸直昇機，早兩個禮拜重講緊做獸醫，但佢淨係醫呀mimi喎！
無論做咩都好，只要唔係害人嘅事，我永遠支持佢向佢嘅夢想理想進發，今日少少嘅鼓勵，你又點知佢唔會成為明日嘅倒垃圾大王，可能研究埋點樣減少同利用垃圾，保護地球，造福全宇宙（同呀媽放棄行賽車呢條路一樣咁偉大！
）！
轉新場 過來打聲招呼先
所謂的成功都無一個定義
太多人將自己的夢想放係仔女身上了
做人最緊要快樂 不是嗎
你講得啱，最近喺fb上睇到一段文字講得好啱，佢話父母將自己對將來嘅驚慌放左落仔女身上，成日話驚佢哋無技能第時大個會搵唔到食，於是乜都幫細路安排好晒，迫佢哋行鋪好嘅路。其實好多人就係因為咁反而失去擁有大成就嘅機會，渾渾噩噩咁過佢幾廿年嘅人生。
報到!!!
好！搵個位坐低先！招呼唔到！:)
十個讚。禧媽文筆好影相又咁靚。。
又話唔冇肥玲咁有天分，其實都唔系吖。依張愛黎參賽都得wor
哇，你咁大頂高帽笠落黎，我連腳趾都比你笠埋啦喎！XD
我姨甥女就醒過口水禧啦, 記得佢仲讀緊幼稚園既時候, 有日突然話, 佢讀完幼稚園就唔讀啦, 我地問佢想做乜野, 佢話唔做野, 日日係屋企睇電視呢….. 又記得曾有位友人有日忽然問我, 係香港係咪無錢就代表做人唔成功, 我當時都唔識點答。 呢個真係 yes and no。 見過唔少人都憎人富貴厭人貧, 見低就踩, 黎抬高自己。 雖然外國月光唔一定係圓, 相對, 佢地唔會在意你做乜野, 啱 channel 都可以做朋友, 人人既 talent 都唔同, 你叫我揸巴士, 整電腦, 我真係會C俾你睇。 就算做7仔, 都係辛苦工。 做人既野, 都係互相尊重。 你要人包容你, 你亦要體諒人掛, 呢D野唔可以單向架喎。
有呀，我個衰仔幼稚園都有講過話讀埋個幼稚園就算啦，以後喺屋企同mimi玩，其他野唔會做喎。我叫佢出去做露宿者，咁就可以乜都唔洗做啦。要留喺我間屋就一定要做野。跟住佢同我講「咁我讀埋一年級啦」，你話係咪吹賬！
錢同成功與否睇個人觀念，有人睇得個錢頭咁大，亦有人視富貴於浮雲，唔同level，無辦法一概而論嘅。憎人富貴厭人貧，我諗乜野國籍都有呢種人，外國都有架，但另一方面又因為佢哋都幾自我，所以未必好怕人嫌自己窮。
學你話齋，最緊要識專重人，一個人唔會乜都識，睇小人哋嘅職業嘅嗰啲人，咁叻有事唔好求人，自己做晒佢吖笨！哈哈！
靚女，我好記得有次我坐巴士﹝果陣都仲有熱狗巴﹝無冷氣巴士，而家已經轉哂冷氣巴了﹞，有一家三口應該搭果條線去探親友，佢地坐上層視野最廣闊的前座，個幾歲人仔不知幾開心咁，同老豆講，第日要揸巴士；我等聽老豆點講啦，點知個老豆咁答：「揸巴士好熱架，坐到8月15好痛架…」咁阿囝就話咁揸的士啦，老豆又話「揸的士好辛苦架…」，聽到我好火起，心諗你唔係應該灌輸個囝知道，每份職業、每個工作，在社會上都有佢既功能，揸巴士都唔容易架，咁大架巴士都 handle 到，要讀好多書至識 etc etc，而唔係你從小就將自己既 standard import 入佢腦，令佢從小就將職業分咗等級。所以之前香港有個9A狀元 quit 咗 fund bank inverstment manager 之類的工作，走咗去「完夢」- 揸巴士，我覺得是個很好的 example，俾細路知道，咩工作是沒問題，有得選擇才是王道。
我就係最怕聽呢啲抵毀其他行業嘅說話，莫講話講比細路仔聽唔好啦，就算成年人之間講都唔好啦，憑乜野去批評人哋嘅職業係高定係低啫！
你講嘅嗰個老豆行行都話辛苦，唔怪之得而家有啲後生咁唔捱得啦又怕辛苦啦！我都想請教下佢咁做邊個行業係唔辛苦架呢？
依家好似無咗中間路線咁, 一班父母以仔女”快樂”為大前提, 跟住就縱到啲細路完全唔識面對任何逆景或批評, 另一班父母就以仔女”成功”為大前提, 只要入到名校多才多藝就唔理細唔係咪自私自閉…. 不過好似少咗父母以仔女做個”好人, 懂是非”為大前提, 可能覺得咁樣蝕底卦. 不過生仔又唔駛攞牌又唔駛考試, 乜嘢質素父母都有, 係啲細路慘啲啦, 出唔出世無得揀.
我細個曾經想過做老師, 但後來覺得自己應該會太上心會做死自己, 因為懶惰劣根性太重而無再諗做老師. 我都有夢想過自己做阿媽架, 不過事與願違, 依家唯有等做阿婆, 又或是玩吓你個仔咁啦.
有好多人用仔女嘅成就黎定自己係成功嘅父母定失敗嘅父母，早已經無左道德嘅標準啦。叻嘅定義係成績好，大個做「高尚職業」或賺大錢，做好人永遠等同蝕底……
做老師真係唔易，做個上心嘅老師更難！我諗你如果去教書嘅話，肯定比而家更瘦，所以都係唔好啦，你無幾多兩肉再減架啦！經驗所得，幾時都係玩人哋嘅仔女比做媽媽過癮，唔洗負責任，玩完拍下個law 友就走，幾爽！哈哈！
可以做到一個偉大的媽媽，給兒子一個溫暖安全的家，令他可以快樂無憂咁成長，呢個理想先係最高啊！
呢個係咪你嘅理想呀？:)
easier said than done. For example, my step-son is a blue collar worker (he did not do well in school). So, he hangs out with other blue- collar people. His social circle is totally different from ours. And he smokes, drinks etc. because his colleagues have the same habits. And all his girlfriends are from lower social levels (unemployed, on social benefits etc.). What is his future?
終於黎左啦！重以為你唔記左我添！:)
香港有個狀元，放棄高薪厚職走去揸巴士，因為佢由細到大嘅夢想就係揸巴士。我估大部分人會認為揸巴士，或其他交通公具都係藍領嘅職業（唔知做富豪嘅司機算藍領定白領呢？:) )， 但做藍領都唔等如無前途啊，同藍領嘅人一齊共事都唔等如一定會學壞呀，我以前樓下有個女建築師，佢日日都係地盤返工，曬到黑到成個男人咁 （我媽第一次見人叫人哥哥！哈哈），但嗰個女人好斯文，從未聽過佢大聲講野啊。我覺得每個行業都會良琇不齊，所謂近朱者赤近墨者黑，點樣嘅人就會同點樣嘅人做朋友，而要做點樣嘅人取決於自小嘅教育與成長背境與環境，應該唔會完全因為份工而形成某一種人格。
不過最重要係嗰個人究竟係喺無可奈何嘅因素下去做嗰份工吖定係佢嘅志願係做嗰個職業，兩種心態唔同。如果係自小嘅志願的話，我估佢會尊重自己嘅職業；但如果係無奈嘅情況下而做的話，咁就完全唔同講法了。:)
我都同意禧媽，但只要自己企梗Ｄ，就算做地盤一樣可以唔煙唔酒，可能真係冇咩將來可言，可能女朋友都係差唔多ｌｅｖｅｌ，但至少可以養活自己。
一日未去到最後一刻，一日都唔知，可能最後都有出頭嘅一日呢，係咪？至於話女朋友嘅level，其實娶妻都係求娶個好女人返屋企顧好頭家，唔洗話一定要娶個碩士博士返屋企嘅。如你所講，最起碼要養得起自己，做到呢樣已經好好了。
其實志願，理想，同實際，真係唔同野呢咖，有時不得不看現實低頭。
禧媽：你真幸運，一早揾到終身職業。(你真喺未做過野，就比禧爸呃左???)
p.s. 點揾啲 emotional icons 呢?? any where under your web page?
雖然唔係所有人都可以達到佢哋嘅夢想，但有太多人只係側重喺現實嗰一邊啦。夢想可能抽象啲，難到啲；但我相信志願係你有機會肯努力無話唔得嘅。大前題係有無呢個機會，連諗下都唔得嘅話，就完全無機會可言。人大左應該行自己想行嘅路，只可以行父母鋪比自己嘅路，呢個人生實在可悲呀！
我有做過野架，係生左口水禧之後先轉行做全職黃種家傭架咋！
有人話遲啲會幫我整啲表情公仔喺留言呢度喎，所以而家係無架，除左你打”:”同”)”，咁就會有最基本嗰個核凸笑樣囉！:(
Hi-Five!!! One of my dream job is the same – 去賣雞蛋仔 and then I want to go and sell ice cream, so that I can eat everyday!! hahaha
It’s normal for parents to be a little anxious of their future, one of the items I have to fill in for my daughter’s handbook asked: 對小孩期望: I wrote – 健康快樂 愛錫家人
I think that’s my hope when I die too. hahaha…
去賣自己鍾意食嘅野叫寓工作於娛樂吖嘛，咁先會勤力工作，因為自己食晒啲貨會無野賣，所以一邊食都要一邊勤力啲整！哈哈！
尋日睇到單11歲為學業跳樓嘅新聞呀，真係心o翁！唔知道當中原因，但我覺得每個為人父母都應該警惕自己，乜極必反嘅道理。後悔真係無藥醫架！