Point Reyes

黎左美國唔經唔覺都超過10年！由起初覺得呢度超悶到而家開始識享受下佢嗰隻悶得黎夠靜夠無拒無束，都經歷過唔少變化。習慣咗喺香港長大，返工返學行街睇戲食飯，你突然叫我放假去行山睇風景，望黎望去都係樹樹樹、海海海、草草草，哇！唔企喺度都訓著？都未計揸車來回嘅路程加埋分分鐘幾粒鐘，就係為左去睇風景，無野哇？

 

Point Reyes呢個地方係好多年前一個朋友介紹嘅。當初去唔係因為風景靚，而係朋友話嗰度有間餐廳嘅蠔好好食。見佢做晒手勢加埋七情上面，哇，餵食嘅我聽完確係動左心想去……食！（咩？以為我係想去睇風景呀？咪傻啦，嗰陣得廿幾邊有咁識野丫？而家都唔係好識嘅其實……) 於是某日成班人一齊去。其實嗰度有個燈塔好出名，佢嘅位置喺加州最西邊嘅地方，面向太平洋，都幾山卡啦，因為去到嗰度手機嘅接收能力大減，可以話係無乜接收能力嗰隻添，所以去到咪洗旨意上網或煲電話粥，除非你有鋪自己扮打電話比自己嘅癮啦。

經過九曲十三彎，幾乎隔夜飯都嘔出黎咁濟嘅路程之後，終於黎到一間叫Tony’s嘅餐廳。其實就唔知可唔可以叫佢做餐廳，睇你用咩準則啦。事關呢佢就係海上面嘅，一望無際，境就好靚啦，但係無論餐廳嘅裡面或外面都有大排檔feel，有啲似坐喺船上食但隻船又唔係遊艇喎，只係又殘又舊嘅木船。入面啲裝修，怕且我未出世前到而家都係咁上下，係呀！間野老過我同你，分分鐘大過我呀媽添！

不過唔好睇佢咁簡陋嘅裝橫，佢串到只開週末（無記錯嘅話，好似係星期五、六、日），閒日係唔開門嘅。主要食蠔同其他海鮮。美國嘅食海鮮並不如香港去西貢或鯉魚門嗰種大把得你揀，呢度食黎食去都係嗰幾款，整黎整去都係「白霎」，煎炸、燒或焗。完全唔會比你喺佢個魚缸揀海鮮，因為根本無呢樣野，所以佢撈到大隻嘅就你好彩，細隻嘅就睇佢有無良心啦，有啲好人嘅會比多隻你當補償。不過由於呢間野都有返有咁上下歷史，上一代重有啲一分錢一分貨嘅思想，所以暫時食過咁多次都無覺得比人昆水嘅感覺。如果撞正當造季節，啲蠔都幾大隻，尤其BBQ嗰啲可能老細見燒完隻蠔會縮少少，所以通常BBQ嗰碟會大隻啲，生食嗰啲相對會細啲。

因為屋企嘅飲食文化影響，我印象中就好似喺出黎做野之前都未食過生蠔啦。蠔豉就有，不過唔多鍾意佢啲味。所以我一路都以為蠔就係蠔豉咁嘅味，去食自助餐係從來都唔會夾生蠔黎試，覺得佢滑潺潺好核凸。不過唔知有次發咗咩顛試左，發覺其實都唔係咁難食啫，加多啲檸檬汁同茄 汁然後一啖吞，唔好咬咪得囉。（何其低能！）好在香港自助餐嗰啲蠔細隻，如果唔係，我應該晨早自己哽瓜左自己，有如食豆腐會哽死一樣荒謬！自此之後，覺得呢尾野值得一試，不過喺香港，我除左食蟹同蝦之外，我唔食其他貝殼類海產，所以食過嘅生蠔數量真係五隻手指都數得晒。

曾經係呢度其他扮高級嘅餐廳食過生蠔，哇！一入口腥到呀媽都唔認得添，重鹹到好似飲左啖海水添！隻野嘅質地重霉霉爛爛林bat bat，都唔好提有幾細隻啦！攪到我又要重洗我嗰招多啲汁一啖吞唔好咬嘅絕招先勉強攪掂左佢！趕住食完去睇戲，其實不知幾驚會喺戲院賴”fee”！

當你試過咩叫好食，你唔會再去其他地方比人昆。Point Reyes 有蠔嘅養殖場 (oyster farm)，我哋成日都講笑話嗰度啲餐廳可能係一收到客人order生蠔之後就即刻喺餐廳下面釣一揪蠔上嚟所以啲味道至會咁新鮮。你會食到海水味，但肯定唔會死鹹，腥而不臭（究竟係咩境界呀大姐？），無架，你唔鍾意食海鮮嘅咪覺得腥囉，但如果鍾意食的話就係一般人形容嘅鮮嘞。總之就係唔洗多汁，唔洗一啖過，絕對可以咬開慢慢㗳真佢味道嘅嗰種好味，明唔明？OK？

口水禧自出娘胎後第一次食蠔。佢喺我個肚入面嘅時候食過一隻，出左世六年幾後比佢自己親自試一次，結果係唔多識欣賞，反而成日想試下咬唔咬得開個蠔殼，早响丫嘛，出面地下大把殼，咬到成棚牙崩晒都得呀！

係，你無睇錯，我仔嗰日係打呔去食蠔嘅。一陣比個全身大家睇下佢最新嘅秋季時裝。

A貨熾哥一向對食都唔揀擇嘅，睇佢食左我整嘅野咁多年都重頂得住就知佢襟捱！好，今次獎好野佢食啦。

如果我無記錯，佢好似話佢鍾意食生嘅多啲，好似話咁樣可以試真啲味道。

我第一野落得太多芥辣（中間白色杯仔入面）哇頂！攻鼻攻到!!!! 我不禁整左個無間道梁朝偉索完啲AA+嘅補品咁嘅樣，坐對面嘅禧爸氣定神閑咁，一邊望住佢個老婆面部肌肉抽筋，一邊品嚐佢嘅生蠔，重不經意咁拋出一句：「放左好多呀？」比當時嘅我。然後我再望過另一邊，我個仔重好忙碌咁咬緊佢手上嘅蠔殼，唉！

食完好野跟住就梗係要去消耗返多餘嘅肥膏呀膽固醇啦！因為我哋嗰日唔淨止食左蠔，重叫左炸魚薯條同蝦意粉，食完個肚已經好脹，唔去行下真係唔掂啦。加上諗住夜晚都會喺嗰頭食晚飯，有間野個bread pudding好掂，所以中午呢餐點都要消滅佢帶黎嘅脂肪先夠膽挑戰夜晚嗰餐。

最好嘅運動就係去燈塔。泊好車已經開始要體力勞動，少少上山嘅斜路都未算甘。下面重有無敵大海景過你欣賞。搵左班年青人幫我哋影張全家幅，但可能我哋無講清楚比人知，全家幅影左，但條好靚嘅海岸線比我哋遮住左。唯有自己出手啦。睇下，條海岸線幾長！

見唔見口水禧嘅獨門打呔look呀？嗰幾日唔知煲左邊套卡通之後就學人話要打呔喎，唉！咁樣同佢出街，係就係尷尬左啲，不過我哋又唔想打擊佢嘅自信，既然佢覺得咁樣好有型嘅話咪有佢囉，還掂又影響唔到人嘅。（佢嘅鴛鴦襪fashion我都頂得住啦，唔爭在呢鋪啦。）

 

結果係我幫你揸機同個仔影，然後你幫我揸機同個仔影。點解唔用腳架？因為太大風啦，我驚部相機會同個腳架一齊比風吹落山呀！事關嗰度係最大風嘅燈塔，莫講話相機比風吹走，企喺度個人都有少少比風吹得郁嘅感覺！奉勸戴假髮嘅人士去嗰度要小心你個假髮會比吹落海！

 

至於兩個都揸機嘅要合照就梗係要靠自己啦，唔通諗住旨意嗰個呔神咩！唔好計較有無線啦，影齊兩個頭喺鏡頭入面已經好難得架啦。條線就忘記佢把啦。

 

擾攘一輪之後就向山上進發，唔好睇佢風和日麗好好陽光咁，其實都有少少凍，尤其嗰日我著住短褲，對甲組腳嘅脂肪都唔夠保暖，要攞條圍巾圍住。

行行下重見到有隻相信係鹿嘅動物係度開餐添！其實揸車沿路中途已經經過好多牛場同馬場，好多牛或馬通山食四圍坐。都市人無乜幾呵有機會同呢啲動物咁近距離接觸，對細路或大人都好新奇。特別係野生嘅就更加難見，平時夜晚喺郊區嘅高束公路旁邊都會出現野鹿喺度食草，日頭見嘅機會真係唔多，唔洗旨意可以行埋去近睇，因為你未埋到去，啲鹿已經閃左九丈遠，塵都食唔切呀！所以咁近，而且重要係日頭見到佢哋真係好難，只有咁山卡啦嘅地方先有可能。大家都好靜，影完相就行開，講野都要細細聲唔想嚇走佢地。

呢方面真係唔得唔讚下啲外國人，當然亦都會有啲敗類嘅，但普遍佢哋都會知道要保護自然生態嘅，呢啲真係靠大家自律同良心，嗰啲掉海星，成隻海豚抱離水面影相呀，割魚翅呀，唉！比條生路人哋啦唔該！

呢啲比風蝕食左唔知幾多百年千年嘅自然現象，唔親身去睇，齋睇書係感受唔到大自然嘅威力！再講丫，你同口水禧講咩「風蝕」，佢真係R爆頭都唔知風係點食野架呢？乜風都有口架咩？

細細力摸係OK嘅，不過唔可以扯甩人哋鬆左嘅沙石。有警告牌寫明唔可以撬甩啲沙石，除左破壞環境之外，隨時有可能成座野倒塌，好危險架！

壯觀嗎？要去到燈塔，係一定要行到落底嘅。落都算，睇完要上返黎嗰下先攞命！呢條咁窄嘅石梯係單線行車，即上落同時都係用呢條野，你睇口水禧係小朋友都係啱啱好夠位，如果有人上黎嘅話，就要大家將就下，你貼埋左邊，我又貼埋右邊，一隻腳行梯級，另一隻腳行斜路。美國人嘅size大家應該都知架啦，所以當日我落去嗰陣咁啱有段路好多人上緊黎，我直情要黐埋鐵絲網行先夠位。禧爸行口水禧前面負責擋住，怕萬一口水禧差錯腳碌落去都叫做有人頂住佢丫嘛。如果唔係，怕且佢會以快過風嘅速度去到個燈塔！

石級側邊就係咁樣架啦，一望無際嘅太平洋。有人話要跳落去游水喎。唔跌C都凍C啦！

呢座野超過百年架啦。裡面重放左以前喺度做野嘅人用過嘅物品同佢哋寫嘅報告。我睇到有篇野寫住：「18XX年，XX號經過呢度補給物品之後離開，失去聯絡，相信已經遇難，船員應該無一生還。」 睇完呢段我都唔敢再睇其他啦。

 

一個字 ~甘！

係我低估左呢條野嘅威力，係我高估左自己嘅腳骨力，當日我喺對腳著住人字拖嘅情況下一口氣行返上頂，中間梗係多次貼埋一邊行斜路多過行梯級啦，行完對腳有少少攰，以為無乜野，結果第二日開始，對小腿嘅腳瓜long痛左我幾日，彷彿佢哋之前一日受到武力對待，比人飛踢左成千下一樣！

行完條長命梯幾乎斷氣無命咁際，有人已經非常唔耐煩咁催住佢扯蝦扯到嘔電嘅雙親>>>要盡快帶佢去頭先有條非常長嘅海岸線嗰個沙灘。

最正嘅地方就係無乜人！頭先我哋就係喺遠處嗰個山頭影落黎呢度啦。

自從入左泳隊後，呢條友已經唔係好怕凍。我哋呢度嘅海水有如冰水一樣，浸得耐係會有凍到痛嘅感覺。以前睇戲都唔明，車！跌落海唔係應該淨係驚浸死或比鯊魚咬死咋咩？點解會凍死呀？海水有無咁凍呀！原來真係比想象中凍好多架，即使喺猛烈嘅陽光底下，啲水都可以比雪櫃倒出黎嘅水凍多好多倍，所以唔著潛水衣，根本無可能落水頂到好耐！

所以佢猛話想游水，真係講笑就得！低溫症好大穫架喎老細！

 

咩呀！哥仔？家下扮影唱片封套呀？

 

水就絕對唔游得架啦，海邊玩下就無防。反正帶左衫替換，有得佢玩到濕身又好，剝光又好啦。記得佢第一次去沙灘嘅時候好怕沙「吉」腳，係都要抱或著住拖鞋；而家想叫佢玩少陣沙都難。沙又玩，泥又玩，總之就係我架車同洗衣機遭央！

 佢口中嘅sir 沙

老豆呀媽有日無晒錢的話，就推你去影寫真幫補下！

玩到咁上下都要去食晚飯啦。沙灘旁有個沖身花灑，哇！啲水凍到爆！但唔沖又唔得呀，唯有頂硬上啦。我覺得我同禧爸都應該係練詠春嘅人材，事關成日都要同時間比賽咁一個抹身一個著衫，啲動作真係來無影去無蹤！

 

 睇黎有人真係好肚餓咁喎！好彩五點幾去到，等左一陣都有位。原來間野可以打電話去留位，再晏啲去怕且要等成粒鐘先有檯架啦！如我哋所願，晚飯之後黎個bread pudding，安心上路 ……返屋企！

題外話：而家去出面食飯，我哋都會比口水禧自己叫野食，有時甚至會比佢自己叫野飲添。從前我只比佢飲自己帶去嘅水，因為怕餐廳比水喉水佢飲唔乾淨，而且除左水，出面果汁或汽水都無益，所以佢咁大個都無乜點飲過出面餐廳嘅飲品。直至而家大個左，我哋覺得應該比佢試下揸下主意落order，有時佢會叫凍檸蜜，有時會叫奶或熱朱古力，其實我覺得係一個好好嘅體驗，亦係建立佢自信嘅其中一個方法。除左咖啡、茶、酒類或汽水，其他都無問題。

自己睇餐單，自己諗想叫乜黎食/飲，再自己點菜，學下做個有主見嘅人，為自己揸主意，唔好第時大個下下都「媽，我唔知點算啊！」或者十問九唔知。我見到呢種男仔，真係好想一個烏蠅拍兜頭拍佢！