車呔禧別來無恙

見呔媽已經出左blog，我唔可以再懶啦！！老規矩，相去何宅嗰度撻啦，我呢度卯相睇。

成年無見過何宅四口人，對上一次好似係某日大家去食越南粉麵，嗰陣禧婆婆都未返香港。無幾耐口水禧就開左學，我成年點過，相信喺度蒲頭嘅人都知啦。講真，將太多時間奉獻比學校之後，屋企野唔夠時間做，同朋友亦都生疏左，因為連假日都要喺屋企剪剪貼貼學校嘅野，根本連出街同朋友食飯嘅時間同精神都無。

無見成年，兩位何家公子變化大左，尤其呔仔，嗰日一入我家門，佢非常有禮兼熱情向我打招呼：「Liza姨姨！」 （真係咁嘅表情喎。不過下次唔該叫我做姐姐啦好嘛？希望會唔會為佢帶黎童年陰影啦！）以前入黎需要少少時間熱身，嗰日所見就非常把握時間玩勒，細佬好似係訓醒入黎嘅，不過眼見哥哥已經開左檔，所以細佬都唔執舒，唔洗理咩矜持啦，玩左先算！過左幾個字，有人午睡完畢由房間急趕出黎會友，眼見兩位友人已經開檔，口水禧更加唔洗熱身，索性連招呼都唔Q 打就埋位！真係無家教！

之前一日我已經醃左部份野食，其實都真係萬分唔好意思，因為嗰兩日係成個郡嘅泳賽，我兩日都要去做野，何宅黎嘅嗰日朝早我晨早六點幾去左開工到中午先返（幾乎比人迫埋要做埋下晝，好彩我堅持一定要閃，只好換黎第二日做全日黎抵償），所以準備唔多野食BBQ。重要掛住吹水，攪到六點先開始燒，燒燒下重要無石油氣，認真瘀爆！ 呔媽微博嗰張相就係我哋發現無石油之時影嘅，幾乎要迫大家茹毛飲血！ 究竟嗰日掛住吹啲咩水我諗左好耐都諗唔起，真係無辦法複述….我唯一記得嘅係大家有傾過三條仔食飯嘅問題，事關我屋企都有件令人頭痛不已嘅慢世魔王，總結就係無得攪，有鬼佢。（我指我嗰件） 可能唔係自己地頭，就嗰日所見，我都唔係好覺呔細二人有嚴重嘅食野問題，隔離飯香呀嘛，反觀我個仔就……唉！有friend喺度，竟然連佢平時愛到發顛嘅朱古力蛋糕都變左唔起眼嘅大菜糕，完全燃點唔起佢嘅食欲。算，我明嘅，爭取時間同朋友仔玩呀嘛，都預左會咁樣。

記憶之中，，嗰日好似係細佬比較多同口水禧有互動，可能係口水禧對於細佬黎講實在係太奇異啦，點解呢為哥仔會攞條口水肩當披肩架呢？點解重要加多塊眼罩遮眼架呢？最神奇係點解呢位人兄講野咁大聲架呢？同屋企呔仔阿哥唔同，眼前呢個成日話自己係貓嘅茂利究竟邊忽似貓呢？如果佢係貓，咁點解同佢屋企隻mimi無忽似架呢？唔知係咪咁，嗰日細佬除左跟住口水禧之外，就係跟住mimi啦。，平時我哋同mimi玩完都會即刻去洗手，如果掂完mimi無洗手再摸自己塊面，好快就會一達二達好似出「風爛」咁款，更甚者會眼腫或者影響其他野啦。因為三條友仔唔係氣管敏感就係皮膚敏感，我驚佢哋會吼我哋大人唔為意時走去摸mimi或者掂佢啲水同野食然後唔洗手就摸面，於是決定將mimi鎖喺書房，咁我就可以放心唔洗驚是但一個賴野。

嗰日呔仔比較鍾意留喺屋入面玩玩具，細佬就一半半，通常都比口水禧點左出去後園玩。可能因為嗰隻口水禧牛高馬大，所以細佬係好服從面前呢隻大舊衰技安哥哥，好少逆佢意。 屋後面個韆鞦架終於大派用場，雖然口水禧唔算成日玩，得佢一條友又真係幾戇居嘅，但一旦有小朋友黎playdate，呢座野就打救我於水深火熱之中，如果唔係，有時啲同學黎玩大半日，你叫我搵咩招呼人呢？呢個年紀，都係繼續同電子遊戲保持少少距離好啲，雖則有人都會玩下angry bird嘅遊戲，但斬劈殺嗰啲就唔好啦，佢有個同學唔知係咪玩得多lego 星球大戰，上次離我屋企見口水禧有把塑膠玩具劍，即刻上左身咁不停舞動把野四圍劈，見禧爸放工返黎即劈禧爸（ 情景恐怖得黎但其實幾好笑！sorry! )，出去後園就猛劈條韆鞦鍊，劈到成把野啲軟膠都爛晒，好彩口水禧無跟住學佢咁劈，如果唔係，我同禧爸塊面肯定每人幾條劈痕都似！

口水禧持住自己最老，於是夾住啲細嘅陪佢喺個閣仔玩，又話揸車又話揸船，又昆細佬同呔仔幫佢”liu” 啲蜘蛛網，真係令人睇唔過眼啦！蠢仔，應該幫媽媽昆佢哋幫我淋下花掃下地呀嘛！ （幾唔係人講嘅野！）

其實嗰日食得最慢嘅唔係啲細路而係四件老坑，越細越食得快，細佬一馬當先一舊接一舊「咋咋林」食完去玩，男人天生都係抵受唔住誘惑嘅，所以可能用引誘呢招對付佢哋食野慢會幾有效喎！講起食野，突然記起好似有同呔媽研究過煮野同埋幫呔仔口水禧整飯盒帶去學校食。此女子終於由半步唔入廚房嘅狀態演變到今日唔入都唔得重越入越enjoy嘅狀態，勁！做人阿媽就係咁架啦，當然會有例外嘅，不過大部份媽媽都會為仔女改變自己，無計，既然帶得佢哋黎呢個世界，就有責任好好照顧佢哋，如果唔係，生黎做咩，咪盞攞黎煩！

聽呔爸媽講呔細二人開始學游水，細佬初頭凍到喊兼飲左幾啖水，所以冬天嗰陣停左一牌，而家再學返。好呀，學游水好，強身健體又可以鍛練意志，口水禧初入泳隊游室外都凍到喊住要走，第二日自己又話要去游。秋季泳隊練習好快開始，到時１０度都要喺室外游，個個隊友都係咁游，有啲泳隊有冬季比賽，有時去落雪嘅地方游室外都係等閒事。其實泳池裡面係暖過池邊，水裡面係唔凍嘅，最凍係上水嗰下，所以準備好保暖嘅游水大褸同毛巾，熱飲同衫褲，係唔會出現人哋所講嘅游完水就冷親呢回事。游完水冷親係因為本身抵抗力唔夠或體內已經有菌，再加上水後唔保暖再減低抵抗力先會賴野，並唔係氣溫低就一定會賴野嘅原因 （當然，講緊嘅係水溫要夠暖，大約華氏75-90 度，你跳落凍到爆嘅水裡面游就梗係會出事啦，低溫症會瓜老襯添！）所以口水禧嘅教練每次比賽前，即使係夏天都好，只要係黃昏比賽或一大早比賽的話，佢都要每個隊員披住毛巾或游水褸，尤其上水嗰下要快啲抹乾水再披住保暖，目的就係唔想佢哋病影響比賽同第二日嘅練習。

呀！啲記憶寫下寫下又返黎少少啦。好似重有講過呔仔寫ABC，連細佬都自己走去學哥哥練字。重有就係朋友間有關小朋友讀書嘅問題。呔細同口水禧唔知係好彩定唔好彩，無強迫佢哋學好多野嘅父母。 我覺得呢啲野無話邊方面係啱邊方面係錯嘅，各自都有自己認為適合自己小朋友嘅教法。好似口水禧咁，雞雞學校無叫過啲細路寫字，但啲細路而家一樣識寫識睇，想學自然識，唔想學打死都識，我係咁樣諗但唔洗全宇宙都認同。

每次黎，我最想睇就係呔仔喺返屋企之前同佢老豆呀媽嘅一番糾纏，真係超好笑！因為佢哋返去嘅途中實會訓覺，所以佢哋都會沖左涼先走。呔仔覺得自己既然喺度沖左涼，就代表喺度訓，所以唔願返屋企要留低。佢甚至會叫佢雙親自己走先，佢自己留低就得啦。睇住佢同佢老豆呀媽嘅拉鋸，通常我同禧爸都只會企埋一邊睇戲 （幾咁賤嘅一對夫婦！) 咁係呀嘛，唔通叫我同呔仔講：「喂，細路，你好走啦喎，唔好諗住係度過夜呀下！」太無人性啦，我做唔出咁嘅事！細佬未學識加入咋，第時２：２肯定重精彩，我到時真係要買定花生擔定凳仔揸定機睇野兼上載上網益街坊呀！ 我諗三條仔再大啲就真係可以過夜架啦，到時何氏夫婦必定可以留低兩件比我，佢哋自己返歸啦！

最後當然係老豆呀媽贏啦，因為佢老豆呀媽昆佢話第二日再黎過！呔仔中計離開返屋企，口水禧係開頭以為真係有friend喺度過夜嘅興奮跌入被欺騙感情嘅惘然中，人哋上左車之後，佢重問：「呀，呔仔佢地係咪ting 日再黎呀？」中計啦傻佬！ 學下細佬啦，幾咁置身事外，空即是色，色即是空……