Max

再養貓完全係因為呢條仔。七年前佢嗰句說話「小朋友就係要有pet一齊grow up丫嘛!」我從來都冇忘記過我仔當日講嘅呢句說話，當然，亦都從來都冇忘記過我哋嘅mimi。

應該話，我從來都冇忘記過我嘅寵物。點可能會忘記呢？

點解拖咗七年先再養返貓呢，當中有好多原因。因為怕再失去、因為要幫手照顧患病中嘅禧婆婆、因為覺得自己一切都未準備好……

2022年5月20號，網上睇到有人話佢要送走養咗五年嘅貓，因為佢老婆對貓敏感頂唔順。$75 美金嘅身價，連同佢所有嘅家當一併送走。神推鬼X之下，我聯絡咗個主人，約好當日中午去佢屋企接貓，因為我想比個瀨屎咁興奮嘅驚喜比口水禧丫嘛！點解會有阿媽想個仔瀨屎咁變態架呢？自從Mimi去咗賣鹹鴨蛋之後，口水禧對貓嘅愛有增無減。每當佢喺街見到貓就會走埋去同隻貓玩一大輪，不論嗰隻貓係人地隻貓又好，街貓又好，乾唔乾淨都好啦，條友都非常大愛咁同貓攬身攬世（當然，有啲貓街口見到佢，人地街尾已經走咗去啦！），後來發展到連狗佢都唔放過，我總覺得佢失去mimi嘅缺失需要一個彌補（或者係我地三個都需要啦），於是睇到網上送貓個帖文之後，我就決定收阿Max返嚟養。

同大家介紹，今年芳齡五歲嘅Max哥~~~一睇呢個豪邁嘅坐姿就知道Max哥食過下夜粥，見過下世面啦！ 根據佢主人嘅描述，Max好細個重係BB嘅是時候係街貓黎嘅，有一日比人發現佢條尾比鐵絲網kick實咗而比佢阿媽遺棄咗。後來呢個好心人救咗佢兼帶咗佢去獸醫度檢查，可惜條尾已經救唔返啦，需要做切除手術。所以Max係一隻冇尾巴嘅貓。

由於業主唔比養貓，養咗半年之後，好心人又幫Max揾咗個新主人，一養就養咗五年，直至落入我嘅魔掌之中，哈哈！就係咁，五年換三個主人，我唔評論之前嘅主人點解放棄隻貓係啱定錯，我總覺得緣份嘅野有時到咗盡頭亦勉強冇幸福。倒不如比佢去一個可以幸福快樂嘅地方生活落去，總比互相折磨更好啦，係咪？

結果，個主人無收我一毫子，佢話佢帖文中要收錢只係希望揾到個真心想照顧隻貓嘅人，佢怕如果話免費，會有啲變態佬嚟攞走隻貓然後攞去餵狗餵蛇……當日接咗Max返屋企之後，條友就一直匿喺茶几底唔食唔飲唔屙，個頭重要攝喺兩個櫃桶嘅中間添！一直到咗第二日，見呢度都無砂煲同支竹嘅蹤影，於是佢孤注一摘，出櫃桶。確定我同口水禧兩個唔食貓肉之後，就無再返去茶几底啦。

其實Max有一樣野真係唔係人人頂得順，佢可能係因為好細個就無媽媽，兼且無咗條尾巴嘅關係，佢會時不時失手「跌金」嘅。如果唔仔細去檢查，好容易就會「男兒膝下有黃金」嘅悲慘版，踩到一屋都係架啦。好彩，暫時重未發生過，但我已經做好心理準備，有一日會喺飯檯見到「黃金」！雖然對潔癖嘅人嚟講，呢個等同滿清十大酷刑嘅考驗，但係養得動物而又知道佢有呢個問題，只有接受，其實都係屎啫，屎喎！係囉，屎之嘛，執完消毒咪得囉，況且佢唔會一大篤咁跌，只係細細粒而已，唔難清潔嘅，睇下我自己幫自己洗腦洗得幾成功！

自從多咗阿Max，我地時不時都會三個一齊恰佢（幾冇人性！）人地話仔女到咗青春期就少咗同父母講野，暫時口水禧都未有呢個現象，而家多咗隻貓，我地嘅話題更多，惜日佢對住mimi嘅嗰種歡樂又重現眼前係最令我安慰嘅事！

到目前為止，呢個八公Max最鍾意恰我，只要佢嫌我煩，有時甚至我只係咁啱經過佢隔離，佢都會咬我，有時重咬到流血添，我啲手手腳腳都好似比人家暴咁樣，我頂佢呀！ 點解架呢？嗰兩件又唔見佢會咁博命咬架喎，睇嚟…..砂煲同支竹都要隨時standby！

「小朋友就係要有pet一齊grow up丫嘛」

我從來都無忘記過呢句說話。

你都要記住媽媽呢句說話……

阿媽就係要同仔啲錢一齊grow old吖嘛

唔該，七年後同我兌現咗佢！