對上一次嘅「給禧兒蕉」已經唔記得係幾多歲寫啦，之後嘅每年生日，連蕉都無啦當然。今年見佢十五歲啦，比吓面，同佢焗咗１００塊曲奇餅帶去練水嗰陣同啲隊友分享吓。好彩，暫時無收過任何隊友食咗屙爛屎或者食完要同佢絕交嘅通知。呢１００塊嘢攪咗我兩日兩夜，因為疫情嚴重嘅關係，我都驚班友仔一上水就個個揾手去掂啲曲奇餅，萬一當中有中咗招自己又唔知嘅人掂過污染成兜餅再傳染晒全隊，我咪大件事！於是每塊焗完再獨立包好入落密實袋封住，所以先要咁多時間嚟準備。
好彩我得一個仔啫，如果有幾個，個個都話要１００塊曲奇餅，我會即刻登報紙脫離母子關係先得啦。
時間過得真係快，轉眼條友就15歲，亦已經高過我同佢老豆。（當然啦，要高過我地兩個有幾難丫！）把聲早就變咗隻老牛，已經唔記得佢細個嗰陣把抵 B聲啦。思想同身高完全唔成正比，佢嗰隻揸到眼珠都變咗磨砂嘅mimi 公仔仍然係不離手，夜晚都要陪瞓嘅。好彩無帶去返學。自己比好重嘅偶象包服（呢個係同音字，我個輸入法唔知點解無嗰個正字）自己，夜晚出街食飯喺車裡面都要戴黑超，如果我唔阻止佢的話，相信佢係會連入餐廳都戴住，可以同佢匹敵嘅當今世上唯有老佢N倍嘅謝賢！ 
下刪無限荒謬嘅偶包行為，來日方長，大把機會爆佢。
已經讀緊高中九年班，成績算中規中舉啩，當然間唔中都係要丙幾嘢先郁一郁啦。而家咁大個，好多時都要提點而冇得夾硬嚟㗎啦，閂埋房門都唔知喺裡面係咪溫緊書。總之我同佢講，我睇成績㗎啫 （係，幾膚淺嘅母親！），如果唔溫都考到A我真係話之佢。無就罰無得打機囉，好公平丫，唔付出何來收穫同享受呢？人生都係咁㗎啦，早啲比佢品嘗吓甜酸苦辣，等佢以後識自己睇路行丫嘛。
暫時同我地兩老都好多話題傾嘅，未至於成日匿埋喺房，亦無話問佢嘢十句都係「唔知」嗰隻。我無乜嘢係唔同佢講嘅，包括教佢將來點揀女/男朋友（<<<我唔抗拒呢樣，只要係真心嘅，理得佢），邊啲係好嘢，邊啲係綠茶，點樣睇假波整容，全部都教 ！
點解？ 上面講咗啦，佢身高同思想唔成正比丫嘛，好易昆架條友！家陣重信聖誕老人……errr…係嘅，呢個係我累佢嘅……但我唔想自己篤爆佢。
嗰日練完水返嚟，壽星仔非常雀躍咁炫耀手中兩包餅，話自己中咗food lottery，即入一次錢販賣機，但跌咗兩包出嚟。貪錢嘅阿媽一聽即刻財迷心竅，心諗 「係喎，適逢生日，處男下海第一次買六合彩好有機會中！」，持住自己當年第一次玩老虎機就中咗千幾蚊嘅信念，教唆個仔比出一堆「冧巴」，由另一個貪錢最近捲入官司嘅X哥嘅A 貨代表去買。重因為無乜經驗亂Q咁買而買到一手都係六合彩，一共買咗十條！一家三口嗰晚邊食pizza同生日蛋糕邊大談中咗千億美金點算……
如果可以，我想將呢張相變黑白再曬大變海報貼喺屋企當眼處，時時提醒自己及屋內所有人 ……
早啲瞓啦！明天起身勤力啲返工賺錢好過啦，
發夢！
Glad that you are back. I still bookmark your blog.
好surprise 禧媽update!!!!! 口水禧好型啊 第一眼覺得好似你!!!!
希望lucky boy快啲帶挈你中獎hahaha!!!
咁第二眼覺得佢似我邊個boyfriend咁呢？
中咗獎嘅話，我應該請咗十個八個家務助理，然後我呢度就唔洗變年blog啦！
禧妈，更新啦，虽然久不久我都会爬上来看看，我系呔仔细细禧禧粉
我都係爬上來更新架，所以大概係呢個速度……
我心心念念嘅禧媽同口水禧竟然有更新！同中安慰獎都差唔多😂！ 尤其見到口水禧變咗口水佬，大咗咁多，班睇住佢大嘅姨姨都覺得「兒生性病母陪感安慰」😆！懇請禧媽有時間出吓post 安慰吓我哋呢班疫情吓嘅香港孤兒！
兒生性病母倍感安慰大小易變快樂滿瀉……
兒生性病母倍感安慰大小易變快樂滿瀉…..
好開心見到你呀
口水禧都大個左好多
佢十五啦喂，我想快啲上岸呀！
哇, 好耐冇黎過, 仲以為禧媽已經封筆。好開心好驚喜呀, 禧哥不知不覺已經咁大個變左靚仔小鮮肉!! 真係開心, 祝禧哥繼續快高長大 :)
點止封筆，經都就黎收添啦!
當佢變小鮮肉之時，亦都係我變老臘肉嘅時間已經好接近啦……嗚嗚～～
好開心見到你update呀禧媽
口水禧完全唔同晒樣!原來已經咁大個
下年可以考車牌添喇!
我對口水禧嘅印象仲係停留喺10年前佢齊陰冬菇頭嗰個樣XD
我都唔明佢點解越大個樣越抽象，基因特變咁樣！已經揾唔到父母嘅基因去咗邊……
考車牌呢方面我要再諗吓，搵吓脫離母子關係嘅有關法律程序係點架先……
口水禧愈大愈似你(雖然細個時都似)。
死啦，15歲仲信聖誕老人，點算？！
眨下眼就15歲，我哋呢啲阿姨阿嬸真係唔認老都唔得呀！
做乜佢地變大咗我哋就要認老啫？唔好認我地識得佢咪得囉！我去佢學校佢都扮同我唔熟架啦（我何嘗唔想直情扮我唔識佢呢！）
15歲重信聖誕老人都唔大穫，最驚係35歲重信啲樣靚身材正嘅女100%冇整容冇假嘢冇P圖，同埋信個女仔20歲從未拍過拖呢吓恐怖丫嘛！ 你話係咪先？ （呢個阿媽究竟經歷過啲咩……)