歸園田居

開學前嘅一次全家旅行，今次無揀啲熱門地方去，反而揀左一個模擬非洲野生動物園嘅地方住左三日兩夜。星期五等禧爸提早少少放工我地就出發食左晚飯再去「酒店」。總共揸左兩個鐘頭車左右，就去到一個無乜街燈，黑到鬼影都見唔到嘅荒蕪地方。因為我地八點先到步，職員收晒工，只有住喺園內宿舍嘅經理幫我地攪入住手續……errrrr 呢個特別服務係要收錢嘅。無計啦，就算佢嗰晚其實要當值睇住間寵物酒店都好啦，我地遲就係遲，要比額外收費係應該嘅，係咪先？

攪好晒手續，我地又再摸黑揸住車兜去隔離街搵個「酒店」入口，入左閘再去搵我地間５號bungalow（平房），喺落車嗰一刻，我被面前間野嚇左一嚇，講左句：「下？帳蓬？唔係啩？」心諗：「玩咁大？」但都無計啦，錢又比左，人又到左，唔通即閃去搵第二間酒店住咩？唯有硬食啦。話實，喺嗰一刻，就算想搵過間酒店都無可能架啦，四圍乜都無，唯一可以訓嘅地方就係條黑到伸手不見唔指嘅街囉。

 

其實佢係一間離地而起嘅帳蓬，除左腳踩住嘅地方係木板之外，其他全部都係帳幕黎嘅。一入到去裡面有啲凍，背脊有浸涼風吹上黎，心諗：「大穫！無帶冬天睡衣或衫褲喎，點頂到第二朝呀？」荒山野嶺，越夜越凍，到臨天光就更加大穫啦，心裡面惆悵緊嘅時候突然望見有個暖風機，哇！見到黃金都唔及見到佢咁開心，拿拿林開著佢吹暖個帳幕先啦。

答左你問題先：係，我事前真係唔知佢係帳蓬黎嘅，我以為間野係木搭嘅。佢個網址真係亂到我無心機睇，淨係睇到安排左咩節目之後就扑鎚落訂。呢啲咪係「無心插柳柳成蔭，無心亂bookbook 成咁」囉。

 

但其實裡面係好乾淨嘅，要有嘅都有齊架啦，除左夜晚係暗少少囉。不過，你要有呢隻原野feel係咁架啦，人地都話明係safari啦，梗係要比啲原始嘅感覺你先叫交足貨架嘛。呀，唔洗諗上網啦，無wifi。要上就用手機啦。不過都暗到想訓，你唔會有任何想娛樂嘅欲望架啦。

所以話要有嘅都有齊，你睇！毛巾、風筒、雪櫃、浴袍、熱水、飲品都有咯，ok啦，係咪？

因為我地個平房主題係斑馬，所以室內嘅擺設，掛畫同裝飾都係以斑馬為主。

好彩嗰日出門前口水禧已經沖左涼，咁都係得返我同禧輪厠所架啫。個厠所好大，一個人沖緊涼嘅同時，第二個人可以刷牙洗面。不過……到我沖涼嘅時候，啲水溫一路下降，最後變凍水！原來法例規定呢啲平房係唔可以裝太大嘅熱水爐，所以熱水有限，要沖涼就要緊記，一字記之曰「快」。第二日我連護髮素都唔落，有得啲頭髮好似潚灑哥咁一餅髮餅就算啦。咁先勉強唔洗沖凍水咋！我無話要參加冰桶挑戰呀！

大家沖晒涼上床訓嗰陣好似係九點幾，勁！一來無野玩，二來第二朝要迎接一個特別嘉賓黎我地嘅平房送早餐。

三條友訓一張king size嘅床。我發誓，以後一定會book間有兩張queen size床嘅房先會同口水禧去旅行，除非我想食佢啲還原靚靚拳啦。黐線，頭半晚比佢踢到羅友都幾乎去左前面咁濟！再加個暖風機，口水禧訓訓下想伸對腳出黎，但因為佢訓中間嘅緣故，如果佢伸腳就變左我同禧爸兩個都要被迫將張被退到落腰位，但部暖風機唔係長著嘅，佢唔著嗰陣其實係凍嘅，咁攪法，三條友容乜易冷病架！但因為我唔知部野要扭到幾多度先啱，於是成晚不停落床去調較部野，結果最後發現熄左佢最好，凍就唔會有人想踢被啦。

朝早八點左右就起晒身梳洗，然後等個特別嘉賓黎，嘉賓未到之前，行出去睇真啲究竟去左個咩地方先。

哇！面前有個差唔多成個足球場咁大嘅空地，裡面有幾隻大象散緊步，有隻斑馬行行企企，有隻駝鳥四圍騰，有兩隻大水牛喺度搵食。如果唔係有圍欄，個感覺真係幾似去左非洲！

一共有十間呢啲平房仔係一片山頭上，大家相隔都幾遠下，四圍都無野，除左樹同草。夜晚會聽到野生動物嘅叫聲，風吹帳幕嘅聲，連遠處動物園裡面老虎嘅叫聲都聽得好清楚，個感覺好似佢地就喺你個帳幕出面叫一樣。

喺呢個時候，見野就爬，係野都摸嘅口水禧野人又點會放過展現身手嘅機會呢？

等左佢好耐，終於都黎啦！真係興奮到唔識形容！

呢隻叫Butch嘅大象係屬於非洲嘅品種。佢同我係同年架，都係屬龍架！本來係有象牙嘅，但佢細個嗰陣自己唔小心撞斷左一邊，得一邊象牙嘅佢個頭好難平衡，於是獸醫就決定剝晒兩邊兼同佢度埋牙筋，雖然無左對牙，但佢一樣好靚仔架，得佢夠高黎啲平房食我地餵嘅野架咋，其他嗰啲大象矮得濟，要咁樣食真係有啲難度。

好彩我啲紋未有佢咁多……

佢企定之後就會伸個象鼻上黎等你擺佢嘅生果蘿蔔落佢個鼻哥窿前，放到佢覺得夠擺入口啦，佢就會用個鼻窿夾實啲野食再伸去佢嘴邊放入口食，呢頭放完個口重o趙緊，佢個鼻又再伸過黎問你攞，有時擺到最後得一條蘿蔔，佢會嫌唔夠，繼續攤大個鼻窿推下你手臂叫你再添啲啦，如果你無啦，推一推佢個鼻，佢就會收鼻淨係擺個一條蘿蔔入口。跟住佢就會調頭走人架啦。（咁現實嘅？嗚~~~~）

Butch送黎嘅早餐有麵包、乳酪、生果。呢個就係佢地稱呼為continental breakfast嘅早餐。食左個包後，想飲杯咖啡，附近揸車十幾分鐘有starbucks，三條友又要原野feel又唔捨得城市嘅生活習慣，齊齊去左starbucks買野飲。

每篇blog必有嘅相

 喺去緊starbucks嘅途中經過唔少農田，種左好多士多o卑梨、車厘子同埋蔬菜。有啲成塊田用左啲好似包書膠嘅紙鋪喺面頭，我估一係就防止雀仔食種子，一係就保溫，再唔係就驚風大會吹走種子？

哇，要鋪咁大塊地，真係唔知要用幾多「包書膠」？

假架啲人！木板黎架咋！遠睇真係會比佢呃到。最近應該仍然係士多o卑梨同菊芋( artichoke)嘅收成期，見到個個田都好多工人喺度摘緊野。餐廳好多炸artichoke嘅菜式，以前我喺香港好似未見過呢隻菜（唔記得係咪禧婆婆好似講過話而家有賣啦），黎到呢度都係去西餐廳先試過，都幾好食架喎，而且對身體非常之好添。

 

紅綠燈前突然有位乘客伸頭出窗外。架車行緊嘅時候，佢個頭就喺天窗度伸出黎，成個大明星咁迎住風吹到面容扭曲，好攪笑！雖然佢主人開到個窗啱啱夠佢伸個頭，但佢動作好快，喺佢後面，只見佢一時中間伸出黎，一時左邊窗出黎，一時右邊窗探頭，好忙呀佢！

十一點準時返黎參觀動物園。其實嚴格黎講，呢個唔係一般比人任睇嘅動物園，佢地一日開兩場參觀時間架咋，重要由管理員帶住成組人去行，行完就要離開，唔可以自由咁四圍行嘅。管理員會介紹每隻動物嘅特性，你可以問問題同影相。根據職員所講，佢地係專門收留啲受左傷兼且無能力再返去大自然自力更生嘅動物；或者係一啲一出生就比媽媽遺棄左嘅動物BB；又或者係其他動物園養唔到佢嘅動物都會黎呢度渡過佢嘅餘生。

因為有啲係BB嘅時候已經執左返黎，所以動物園嘅老闆係可以同佢地有互動嘅。獅子、老虎、熊、狼都可以出籠同老闆一齊散步，無錯，佢地會出黎行架！有時重會被帶去一啲場合，紀律部隊嘅畢業禮、影相、拍廣告或電影等等。如果你想同佢地散步，咁就要做佢地嘅VIP比好多錢先得。上千美金係走唔甩架啦。

望見佢地被困喺籠裡面其實都幾心酸，但又明知佢地無可能再返出去靠自己，希望啲管理員會好好照顧佢地，等佢地喺度無憂無慮咁生活啦。不過啲籠真係好細，同動物園嘅比真係無得比。有啲連口水禧間房都大過佢。可惜係呢度唔係大財團經營嘅，所以要起新設施一定要靠捐款或者入住率同參觀動物園嘅收入維持，起新嘅老虎籠進度緩慢，啲獅子老虎唯有住喺啲大型「劏房」先啦。

點解會咁衝動就book左黎玩呢，咪就係呢個環節囉！唏！你有幾何可以咁近接觸大象，重可以同佢沖涼先？認得佢嗎？佢咪今朝黎送早餐嘅阿Butch囉！無牙Butch呀嘛，好易認啫！佢好似有去過拍電影，所以好聽訓練員指示。不過最重要梗係不停比野佢食，佢先會咁定企喺度任你魚肉啦。

口水禧期待呢個環節好耐，一到佢幫大象擦身嗰陣，條友點咗啲泡泡之後，因為上重下輕嘅關係，佢一野將個刷頭扑落Butch個身度，好彩Butch掛住食都費時理口水禧，比佢連扑左幾下都唔郁。後來Butch身旁嘅訓練員見勢色唔對，驚口水禧再扑多幾下， Butch一陣發老脾踩佢一腳就大穫，於是訓練員出聲叫口水禧輕手啲，口水禧先知自己唔係同Butch刷身而係打緊佢呀！

我在旁好努力咁刷緊Butch嘅後半身，腳趾甲都刷埋架！期間可能係口水禧打穫阿Butch令佢條氣唔順，Butch放左幾個響屁，但我食晒喎，點解咁呢？專揀我刷佢羅友附近嗰陣先黎炒蛋，喂！冤有頭債有主，我係無辜架喎！嗚~~~~~

呢個時候點解少左個人呢？佢咪閃左去喳機影相囉。佢對於呢啲動物野興趣唔係好大，更何況落手落腳沖涼執金呢啲粗重野。我接受對動物興趣不大嘅人，但唔接受唔鍾意佢地而出手虐待的，實在要不得。（下？你仔啱啱先打穫Butch黎喎！）

刷左一陣（當然唔會比你刷晒成隻大象啦，我地手腳咁慢，真係刷得黎都天黑！）就要同佢過水，我地兩母子開始嘅時候爭住揸水喉，曾經唔小心攪到連訓練員都比我地過埋水！最開心應該係Butch，我哋幫佢個訓練員沖埋涼。

係，又係食嘅時間。比我地過完水嘅訓練員話咁樣係獎勵Butch頭先咁乖企定比我地打，呀係刷同洗先啱。啱嘅啱嘅，乜脾氣都無發過真係算係咁架啦，畢竟都係一隻動物，佢理得你同佢沖涼定R痕，唔鍾意嘅話調頭走你都吹佢唔賬，再唔係嘅話，用條象鼻抽打你都得啦，Butch真係好有家教，從來無喺我地或訓練員手上強搶食物，佢一定會等我地放落去佢個鼻窿度先食。

影呢張相好好笑 ，其實當時Butch側邊重有幾隻佢啲朋友仔喺度一字排開，訓練員做左個手勢，隻隻大象即刻丫大個口比我地檢查牙齒，佢地個嘴本身已好似笑笑地，再丫大埋個口露大牙就更加想幫佢地配音~~~~ahhhhhhh~~~！ 呢隻因為對象牙大彎，倒插自己塊面，多年前已比獸醫幫佢磨短左對牙，得返咁多。

點解佢地會咁乖肯擘大口比你睇佢啲牙呢？因為訓練員會拋啲野食入佢地個口，所以隻隻丫大個口等食囉！

原來非洲嘅大象不論男女都有彎嗰對象牙嘅，亞洲嘅大象就只有男仔先有。而亞洲嘅象明顯細隻過非洲嗰啲好多，矮半個頭，所以Butch每朝都負責送早餐兼表演食野，真係生得高果然有著數！

一般嘅大象大約有60歲壽命左右，Butch 今年38，已經象到中年啦！

點解佢地會成日郁對耳仔呢？原來係耳仔後面有血管喺度，拍對耳仔係因為要散熱。

除左大象之外，係咪覺得個構圖有啲怪怪地呢？何解會有隻駝鳥同斑馬架呢？原來隻斑馬唔鍾意同其他有蹄嘅動物一齊，訓練員本來諗住將佢同大象一齊放會有啲阻嚇性，起初隻斑馬串串貢諗住扮大佬，Butch用象鼻捲起佢黎fing 再掉返佢落地，但日子耐左，呢兩隻野變左老死，而家Butch行到邊，隻斑馬就跟到邊，重有時會四圍管下其他嘅大象，趕佢地去呢度嗰度，訓練員話隻斑馬已經當左自己係大象，所以佢地有得佢同啲大象一齊住。嗰隻駝鳥呢又係鍾意扮大佬，凡親有乜風吹草動，佢都第一時間埋去八一餐，最攪笑係佢邊行緊過黎嘅時候重會鬆毛鬆翼咁，好似啲好刻薄嘅訓導主任準備埋黎鬧你咁嘅樣，但佢行到埋黎又無野架喎，真係純粹埋黎睇咋喎。

成個組合真係好少林足球咁，勁騎呢！

 

野生嘅大象都係靠個鼻吸水再轉送入口飲左佢，所以佢地個鼻好重要，差唔多等如我地嘅手咁重要！

飲勝！yeah! 

家陣老笠，袋入面嘅野食交晒出黎！如果唔係，一陣炒隻臭蛋臭瓜嗰邊肥嘟嘟嘅luen毛強！

Butch擺好個縮腳pose 之後，訓練員就叫我地去摸下佢腳板底，哇！同我腳底嘅死皮有得揮呀！

參觀完動物園出去食午餐，然後又要返去平房等兩個特別嘉賓過黎。其實如果唔介意嘅話，我都想將呢條友推薦比動物園老闆，事關佢除左個樣似人類之外，佢嘅動靜其實同其他好動嘅動物無兩樣。佢簡直就係馬騮嘅化身；鸚鵡嘅代言；人類嘅宿敵！除左動物園，真係唔知邊度可以給佢一個五星級的家！唉！

唔洗講野，心照啦！

之前參觀動物園之後，職員提左我地3:30記住要返黎平房等，如是我地食完午餐就即刻返黎~~~~~等~~~~~~ 都真係等左幾耐下。所以呢條友梗係唔會同你坐定定喺度等啦，佢身有野咬架嘛，唔郁唔得架佢！

因為我地住嘅平房對開就可以見到大象，斑馬同駝鳥喺佢地個場嘅自由活動，索性沿住條路行落啲探下啲動物啦，順便影多兩張相。因為啲流程實在太快啦，等嘅時間比較長，但啲動物黎到後好快又要趕去下一家平房，所以唯有趁呢啲等嘅時間（亦即係自由活動啦！）去影下相囉。

☟

重有咩好講？

第一個黎探我地嘅就係呢隻叫Gabby嘅狒狒，今年兩歲。Gabby 表演左佢嘅打關斗特技比我地睇，又喺地下滾黎滾去，一陣又跳上職員個身上甚至頭上玩左一輪，見到佢我真係有似曾相識嘅感覺……

睇下！人地動物園有隻狒狒，哼！我夠有一隻養左七年幾嘅人類狒狒，綽號「狒得」嘅順德溝廣西混血兒狒狒啦！我嗰隻重有衫著嘅添！係我錯，我應該即刻比Gabby同口水禧呢對失散多年嘅兄妹相認，繼而將口水禧留低喺動物園陪住佢個妹Gabby成長嘅！

又等左一輪，第二個黎嘅就係呀Stewart，一隻只有四個月大嘅熊仔。佢好專注咁喺地下「碌地沙」，全程無望過我地一眼，更加唔會望鏡頭比你影佢正面啦。Stewart係由第二個州嘅動物園移民過黎住嘅，聽講佢比呀媽棄養左係森林，比人發現左，於是執左佢返去動物園養大，後來因為我地去嘅呢個動物園本身有隻大熊太大隻，住唔落個籠，於是兩個動物園協議交換兩隻熊，大熊去住大啲嘅地方，Stewart就過黎住，我諗佢再大啲都要搬架啦。

Stewart走左之後，本來動物園有兩個活動可以參加嘅，一個就係幫手趕啲大象返入去佢地個室內休息場地；另一個就係幫手準備餵啲老虎食晚飯，兩個活動都要付費嘅。因為一早已經book左檯食飯，所以我地無參加呢兩個活動就出發去左 Monterey一個叫Old Fisherman’s Warf嘅地方。嗰度真係好似三藩市嘅漁人碼頭咁樣有好多小型鋪頭同埋餐廳喺兩邊。前一晚我地四圍打電話去Carmel嘅餐廳book檯都book唔到，後來搵到呢個漁人碼頭嘅餐廳就求其book住先啦，因為動物園附近想搵間好啲嘅餐廳都唔易，所以喺Monterey是但搵間頂住先。後來發現漁人碼頭大把餐廳，洗鬼book咩！噓！

喺海邊食野一定係海鮮為主架啦，西人食海鮮通常都係離唔開燒呀、焗呀、水煮呀等等，唔會同你薑荵炒架啦。漁人碼頭嘅餐廳食物質素講真就普通啦，除非係一啲級數好少少嘅就會好啲。門口會有試食攤位拉客，要拉客嘅話，咁大家明白佢有幾好食啦。哈哈！

 

見唔見屋頂上有啲一粒粒嘅野呢？實情係啲海鷗黎嘅，佢地喺度做乜？咪喉住邊檯跌左野食落地呀，邊檯人客賣單走左呀，啲海鷗趁侍應生未得閒去收檯之前用９秒９嘅時速飛插落去搶食，不過當然啦，侍應都唔係第一日出黎撈架嘛，佢地都驚啲雀會騷擾到人客，咁自己就會比老闆「騷擾」架啦嘛，所以啲雀真係大部份時間都係得個睇字而已。

 

食完晚飯見時間尚早，禧爸提議去starbucks買杯咖啡後先返去動物園（我有理由相信佢唔知係咪偷偷入股starbucks，放假都要去「得一得」先安樂！）嗰晚都係好早就訓啦，唔訓都真係唔知有咩好做。半夜比老虎嘅叫聲嘈醒左，禧爸話有啲驚驚地喎，車！人地喺籠入面，都唔知佢驚咩！

朝早呀Butch探完我地之後，我地又去左”starbugs” 老細間鋪坐一坐。當禧爸去左買野嘅時候，我地兩母子又「病發」啦！

口水禧學我呢個嘴學左好多年都重未拿捏到箇中嘅精粹，鬥雞眼就更加唔洗講啦！唔知坐側邊檯啲人有無一刻想報警呢？

飲完咖啡返黎就係執野鬆人嘅時間啦，好彩住得嗰兩晚唔係好多野執，我最怕就係執行李，執入去又煩，執返出黎重煩！臨走前同個平房合照一張留念。

連人地屋底都唔放過要睇下，好乾淨，唔覺有蜘蛛網。

 

見我地話要落車影下個門口，佢又點會放過大好機會呢，想爬左好耐啦梗係!

體驗扮去非洲野外生活幾乎凍水沖涼親近動物兩日遊

離開動物園之後，我地去左Monterey 搵食（又去！）本來想搵嘅嗰間餐廳原來喺水族館入面，要入去間餐廳就一定要買水族館嘅入場券先得，但眼見到就快兩點鐘，我地重要揸兩個鐘頭車先返到屋企，中間重要食晚飯（又食？），所以無打算去水族館，正喺唔知點算嘅時候，有個水族管義工伯伯醒左間附近嘅餐廳叫我地去試，佢話唔好去啲好似我地之前嗰晚食嘅餐廳，去試間好野啦。就係咁，我地就去左試好野。

呀伯伯果然無介紹錯，間野喺海邊，我地重有得坐窗邊位添。出面有人喺度撐艇，滑浪；又有海獅游水曬太陽等等。價錢無我想象中貴，有時以為呢啲有靚景你睇嘅餐廳點會唔斬你一頸血呀？係咪先？好彩外國嘅餐廳食物都偏大份，而我地又食左少少野先黎，所以口水禧自己食個兒童餐，然後我同禧爸兩條友食一份，加個周打魚湯同前菜就已經飽到上心口。

兩杯野飲（飲完免費再斟）、一個湯、一個前菜、一個兒童餐、一個龍蝦同蟹嘅主菜，計埋小費同稅，盛惠$8x。邊個黎三藩市Monterey玩嘅有興趣可以去試下，間野叫Fish Hopper。

見到呢張相先醒起唔記得講件瘀事。話說到步第二朝，大家梳洗完換衫嘅時候發現原來我乜都有帶，淨係無帶口水禧嘅出街衫，問你服未！我成日都發生呢種事，乜叉都有帶，未必會用到嘅都會帶，唯獨是一定要帶嘅偏偏總會無帶，唉！究竟有無得醫架呢？好彩係住兩晚，口水禧第一晚由屋企出發著嗰件衫可以頂一日，第二日就要買一件替換。佢身上呢件野就係咁樣跟我地返屋企架啦。

自從剝左隻小三牙之後，佢隻門牙有少少跡象落返黎，唔知口水禧係咪形住重有傷口，食野時總會特登將舊野擺喺側邊食。最奇特係呢舊野係菜黎架喎，唔洗好大力都咬到啦大佬！

有人食食下諗起離開呀Butch要返屋企突然悲從中來，流左幾滴馬尿。重話叫mimi自己照顧自己，我地再返去搵呀Butch喎，哇！男人心其實咪一樣係海底針，話變就變，貪新忘舊，以光速見異思遷！

好快我地就會越黎越多兩公婆嘅合照架啦，因為有條友顧住玩已經唔係好鍾意同我地合照啦。重好，唔洗下下就佢個高度攪到我地兩個要低抄，啲雙下巴鼻哥窿啲鼻毛出晒黎！半踎黎就佢時，佢又面抽筋，無張相正常，真係把鬼！要佢正常啲，佢又黑口黑面咁，車！呀姐我家下先唔同佢影呀，我地兩個自己影。

正所謂你當佢係寶時佢當你係草丫嘛，當你叫佢影嗰陣佢就吊高黎賣；好！唔叫佢影，佢咪自己死死地氣撲埋黎影囉！（唉！佢個執劉海……究竟發生咩事呀？）

佢自己要求要影嘅景……

之後去左撲蝶……（唔好問我點解，我唔係佢個層次，唔會明。）

在XXX，XXXX雙（你懂的……)   

喺Monterey嘅最後一站就係佢最近愛到發顛嘅frozen yogurt。除左因為食之外，我諗最吸引嘅係佢可以自己揀口味同裝入個杯度，重可以揀自己鍾意嘅配料，糖呀、m&m呀、oreo呀咁，爽到爆啦大佬！

好彩重記得乳酪先係主菜！

一年級嘅暑假終於完結啦，二年班嘅佢開左學一個星期，總算順利無乜波折。二年班都會有波折？有架，重會有同學喊住唔肯返學架。細路仔成長有快有慢，遲早有一日會達到目標嘅，如果大家肯比時間佢地「進化」。口水禧最近呢幾個月嘅壯舉 – 夜晚訓覺唔再用尿片。係呀，七歲幾甩左尿片，對我黎講，唔係問題。醫生話八至九歲前夜晚用尿片都重算正常，再大啲嘅話先要去檢查。以前聽過有父母用羞辱甚至懲罰嘅方法迫細路「戒片」，關於小朋友嘅野，我對個「戒」字超反感，需要就係需要，戒乜鬼野？到佢唔需要嘅時候，佢自然會「甩」，只要喺健康良好嘅情況之下有需要就唔係病，唔需要「戒」。

邁向八歲嘅口水禧同一般八歲嘅小朋友一樣，開始進入「小男孩」嘅階段，心智同行為雖然重係間揭性有啲「低B」，但我相信佢自己靜靜地蛻變緊，作為佢嘅父母同親密戰友，我同禧爸主力係從旁比佢鼓勵，等佢建立自信。八歲呢個年紀，係決定佢將來待人處事同人際關係嘅重要關口，尤其同媽媽（或主要負責照顧佢嘅嗰個人）嘅關係最為關鍵性，關係好，第時佢大個之後同其他人相處就會好啲。（資料來源：Your Eight Old: Lively and Outgoing）

深呼吸，準備好，無有怕！

~完~