參觀消防局
摺埋咗幾日﹐除咗咳到自己都唔認得自己之外﹐重學識咗"cap痰"添﹗唔信我唔識﹖我真係唔識喎﹐往時都係咳呀咳﹐有痰喺喉嚨但唔識吐出嚟﹐咁即係......吞返佢囉。(我知﹐好核凸﹗但我唔知點樣可以將篤野由個喉嚨運送去到嘴邊吖嘛﹗)呢次嘅感冒認真神奇﹐第一日係喉嚨痛到爆﹐食咗屋企嘅成藥都係唔掂﹐於是走咗去睇醫生﹐希望佢會寫醫生紙比我去藥房買藥。點知個醫生話感冒食成藥都得﹐點咗我去買咳藥水同止痛藥。後來D喉嚨痛係食我屋企嘅中成藥搞掂嘅﹐嗰陣都未有鼻水住﹐心諗個醫生都唔知係咪玩野亂咁講我感冒架﹖點知嗰晚就開始多鼻水同咳﹐第二日重要去口水禧學校co-op添﹗唉﹗我都唔想去播菌架﹐但因為唔夠co-opers兼有D家長本身嗰日都要co-op嘅都病咗﹐咁我無第二個人替我﹐咪只好頂硬上囉。最多唔同D細路講咁多野同埋離俥哋遠D喇。之後接連嘅幾日發生乜野事﹐我諗有試過感冒嘅人都應該好清楚喇。主要都係食同瞓喇﹐莫講話間屋幾日無吸塵﹐張床都幾日未執過喇。真係超頹﹗每當我食咗藥眼瞓到爆嗰陣﹐我就迫埋口水禧一齊瞓﹐好彩而家佢大個仔﹐自己瞓醒咗會自己出廳玩﹐呢幾日一撻落床瞓覺就諗﹕「好彩我得一個細路咋﹐你話如果我重有多一個細嘅要湊﹐真係命都比埋佢呀﹗」而家都重咳緊﹐不過已經好過前幾日﹐嗰個衰仔口水禧重要我一咳﹐佢就笑﹐佢話我咳嘅聲好好笑喎﹗呢幾日咳少咗﹐佢重問我點解唔咳多D﹐佢竟然話﹕「我想你咳多D呀﹗」你個衰仔﹐係咪想呀媽咳都吐血呀大佬﹗
