口水禧個blog

語言治療師叔叔：禧禧呀，學校最近有無啲咩得意野講比我知呀?口水禧：我做數學功課，學校比左張紙我呀。叔叔：下？比張咩紙你呀？口水禧：咪就係一張紙囉。

自從上星期三開始﹐口水禧就自己放自己spring break。人哋係四月放﹐我哋提早放。呢D咪叫做快人一步﹐理想達到囉﹗ 重要呢個DIY 假期唔知會放到幾時架喎﹐事關到今日為止﹐呢位人兄重有燒嘅。學校唔比佢返學住﹐要佢退晒燒24小時先可以重返校園。有同學見口水禧咁耐無浦頭﹐有D擔心佢比我溶咗﹐於是叫呀媽電郵我﹐問下口水禧呢個禮拜去咗邊度發生乜野事。D 同學都叫做好有佢心喇﹐唔見咗咁多日開始識得擔心呢位同學私自放spring

咁有閒情寫blog﹐當然又係某人賴咗野唔洗返學唔洗趕頭趕命﹐可以「優哉悠哉」(<<<真係諷刺﹐要病先可以優哉悠哉﹗ )咁坐喺飯枱前上網。上兩個禮拜﹐班中好幾隻病貓﹐又咳又打乞懥又流鼻涕又發燒﹐真係你想點都有﹐直覺覺得口水禧都好快會加入埋一份架喇﹐結果拖咗兩個禮拜﹐真係「得咗」﹐前晚開始發燒﹐尋日倒下請假喺屋企「痞登」。做個負責任嘅成年人﹐個仔發燒就要留喺屋企隔離﹐我唔會教個仔講大話扮無病夾硬去學校播菌嘅。好幾次﹐D細路比老師問佢係咪病﹐細路搖頭話無﹐然後偷偷喺我耳邊爆比我知「my

落咗一個禮拜雨﹐聖誕節都無面比﹐照落。 同親友食咗一餐﹐但同慶祝佳節係無乜關係﹐因為我哋去食中式炒粉麵﹗ 呢D節日﹐除咗中餐之外﹐其他間間都閂門。中餐都要早早去排隊先有位﹐節日流流出街嘅代價就係要早食飯﹐除非你唔介意等檯企到變化石。但我介意。放假落雨﹐最好嘅節目就係痞喺屋企休息。悶﹖口水禧或許會﹐但我哋兩條老野覺得休得唔夠喉添。聖誕前比學校「o車」咗我兩個禮拜兼開夜車﹐重有兩日由朝八做到口水禧放學﹐因為嗰兩日係代課老師嚟代堂﹐但我個人覺得係我去代堂多D﹖﹖﹖﹖ 經過兩日比31件豆丁催殘之後﹐我條喉嚨開始覺痛﹐個代課老師連聲都沙埋﹗ 搞埋個party,我決定要大休﹐如果唔係我會好快「開皮」。呢兩日將口水禧交比佢老豆﹐我主力家務。(又話要大休﹖講笑咩﹖我哋呢D黃種工人邊有得大休吖﹖)有人話要去學滑雪﹐朋友話﹕「你兩件老野唔跟埋去學﹐第時個仔學識咗﹐你兩個諗住用腳追呀﹖梗係要一齊學喇﹗」講真乎﹖

呀蛇(sir)﹐我要舉報有人虐待動物......馬﹕ 嗚~~~嗚~~~~ 咁大架馬車﹐叫我哋點拉得郁呀﹖ 

口水禧參日去咗牙醫叔叔度照X光﹐不過醫生尋日病咗唔喺度﹐所以要下個禮拜先可以比醫生檢查隻新牙點搞。我將呢度見到嘅同我自己幻想嘅問題﹐一次過問過D護士﹐佢哋聽完我講之後﹐互望然後無奈地笑完先答返我問題。雖則佢哋唔係牙醫﹐不過我諗關於牙嘅野﹐識得比我多好多好多。好似口水禧呢D異形牙嘅小朋友﹐佢哋話見過好多好多。因為每個人嘅體格同身體變化唔同﹐連甩牙出牙嘅時間都會唔同。有D細路係會先甩乳齒後生恆齒﹐有D會先甩乳齒﹐格成年先出恆齒﹐個口真係擘大得個窿成年先有隻牙出嚟擋一擋﹐真係慘﹗ 有D茂利會先出恆齒再甩乳齒﹐有D乳齒係會霸住死都唔走阻頭阻勢﹐遲下先自己甩。千奇百怪﹐乜鬼style都有。但護士只有一個答案﹐就係呢個係小朋友自己成長嘅時鐘問題﹐同係咪乳齒被保護得太勁﹑唔咬野﹑食爛飯等等係無關﹐因為有好多小朋友無呢D習慣但都會有同樣嘅情況出現﹐所以出牙先定甩牙先係因人而異﹐無固定嘅規律。但最最最緊要係一定要保持乳齒清潔﹐因為有D小朋友出恆齒嘅時候已經蛀鬼咗﹐因為蛀咗乳齒無即時揾牙醫做野﹐結果一直蛀到入去下面未出嚟嘅恆齒。我聽過有歲幾嘅小朋友都會蛀到要「杜牙根」﹗ 已呢個小朋友成個過程係要全身麻醉咁做。一個咁細嘅人要全身麻醉梗係唔好﹐但無計喇﹐咁細個點會肯同你瞓喺度任醫生魚肉呢﹖所以乳齒都好重要架﹐咪以為蛀咗唔緊要﹐重有隻恆齒頂住。

自從出咗上篇blog後﹐正所謂好嘅唔靈衰嘅靈﹐個破解密碼好似開始失效﹐我又再度回復煎魚嘅狀態中。A~~~不過咁﹐做實驗嘅野無話做一兩次就得嘅﹐我會繼續試﹐就算最後真係失敗﹐自少我都換嚟六舊腹肌吖﹐都叫做有收獲吖嘛﹗不過呢幾日個肚腩肉真係有少少痛﹐抵喇﹐儲咗咁多年嘅肥膏一下子想殲滅佢哋都唔容易﹐唔知幾時我先可以著咗褲之後dup低頭見到個褲頭架呢﹖

點搞呀﹖學異形咁生多棚牙分前後座咁話喇喎﹖ (相片攝於飯後刷牙前﹐比較令人作嘔) 呢獲真係箍牙嗰陣有排受呀﹗想當年個呀媽有隻爆牙﹐呀婆帶咗佢去箍牙﹐真係又另一滿清十大酷刑﹐痛咗年半﹐所有口腔內掂住牙箍位嘅牙肉﹑口入面嘅肉都刮爛晒﹗每月調整個牙箍鬆緊度之後幾日都食唔到固體野﹐齋飲維他奶充飢。結果箍完正當脫離鋼牙行列之際﹐對門牙原來蛀咗﹐過多十年換埋做假牙﹐頂﹗

年屆五歲零十個半月嘅口水禧近來變咗長氣公一名﹐好煩呀﹗一件事不停講完又講﹐問完又問﹐認真係考驗我同佢老豆嘅EQ。佢老豆EQ出名好﹐但個呀媽喇喎﹐出名係無EQ的。係﹐我一出世就漏低咗我嘅EQ喺禧婆婆個肚裡面架喇。點解突然要爆某人長氣呢﹖見到佢身後嘅聖誕樹嗎﹖家陣先至11月中咋喎﹐未有耐到聖誕喎﹐點解棵樹會出咗嚟架呢﹖咪就係有人一日不段播帶咁哦住佢嘅雙親要砌聖誕樹﹐由halloween未到已經開始哦﹐完全無比佢老豆呀媽有喘息嘅機會。 結果喺不勝佢嘅奪命煩厭黑白天哦嘅一輪襲擊之下﹐佢老豆呀媽宣告投降﹐喺車房攞盒封晒塵嘅聖誕樹出嚟「降樹」喇﹗睇下佢幾孝順﹐當個呀媽啱啱幫佢班忙完個thanksgiving