Author: 禧媽

唔知香港有無D咁嘅人﹐但喺呢度就見過幾次﹐全部清一色女士﹐我服咗佢哋嗰股無比嘅勇氣﹐咁樣衰嘅事﹐即使我個頭笠咗絲襪都唔夠膽做...... 話說我喺costco曾經不下數次喺收銀前比人突然九十度咁插埋嚟我條隊﹐企正喺我前面。連禧爸都試過比人成架車大力推埋去撞到bang一聲﹗通常個情景係當我步向收銀嘅時候﹐喺我嘅三點或者九點方向總會見到有個C奶推住架車衝緊埋嚟(costco嘅手推車係比其他超市嘅大好多﹐重好多)﹐總之呢D女人見你行快D﹐佢又行快D﹐明明係無可能爭先過人都要夾硬嚟﹐喺電光火石嘅一刻﹐當我到達收銀處之時﹐個八婆人未到﹐但架車就到咗﹐打橫90度咁片去我前面﹐可想而知佢臨尾嗰下係一掌將架車推埋嚟﹐總之死都要將架車插喺我前面為止。(如上圖﹐我係A﹐嗰個八婆係B) 人人都係向同一個方向排隊﹐呢D八婆就偏偏成條骨刺咁插喺側邊﹐點解佢會打橫插﹖因為我都唔會退後架車比佢攝返入嚟正正常常咁同其他人一齊向同一個方向排。既然佢咁鍾意打橫插﹐我就有得佢打橫排囉﹐有時呢D蛋散排排下覺得好面懵就會突然走咗去第二條隊。條骨刺就會自動消失。 暫時我淨係比亞洲人咁樣插過﹐。有一次係我推住架車行緊去收銀處﹐啱啱到嗰下就有個八婆突然飛架車埋嚟打橫「得」喺我側邊﹐重要陰陰嘴笑望住我兩母子﹐唔知佢係為自己咁勁爭贏個湊仔婆而笑定係為自己咁醜嘅行為以笑遮醜。我一直都無退開架車讓佢入返嚟條隊﹐因為我覺得佢係故意同我爭﹐我咁大個人推住架咁乸大嘅手推車﹐上面重坐住個細路﹐佢無理由見我哋唔到啩﹐如果見唔到就根本唔需要同我鬥快行喇﹗結果個八婆排排下自己走咗去第二條隊就算。 尋日又見到另一件極品。閘咗我三次﹐即係由第一個收銀處閘一野﹐跟住我去排第二條嗰陣佢又嚟閘多野兼夾同另外一架坐住輪椅嘅人大家九十度左右閘住﹐我企喺佢哋後面望住佢哋兩個勢不兩立﹐於是我再到第三個收銀處嘅時候﹐個八婆再想嚟閘多野﹐攔腰睇住我行緊埋去都推架車閘埋嚟﹐當時我無推手推車﹐同口水禧捧住野行緊埋去收銀度﹐嗰個PK都閘埋嚟﹐不過我手快一野將手上面D野放咗喺條輸送帶先﹐嗰個八婆先無晒乎企喺後面﹐嬲爆爆掉野上條輸送帶﹐個樣好似話緊我打佢尖咁款。 我個仔喺度又無比佢撞到或者嚇親﹐我費事同佢硬碰。算數。我個仔唔喺度我就........還掂我又唔係未試過比人報警叫警察嚟拉我﹐我無錯我唔會驚架喎﹗...... 呢D女人唔單止係女人嘅恥辱﹐直情係人類嘅渣宰﹐莫講話對方係男係女都好﹐排後一個唔會死架係嘛﹖重要人哋拖兒帶女﹐一個女人推住架牛龜咁大架嘅手推車步履欄跚咁"lan"緊去收銀﹐嗰D人渣就蝦人唔夠佢快﹐於是就打橫插喺人哋前面﹐重要唔見佢夠膽去插鬼婆前面吖笨﹗亞洲人蝦亞洲人﹐不知所謂﹗趕時間﹐你可以禮貌地問下人可唔可以比你排先﹐喺呢度十個有九個半嘅人都唔會話唔讓嘅。如果我見到我成車野﹐人哋兩隻手托住一包野咁排我後面﹐我都會讓後面嗰個排先﹐問題係有無禮貌吖嘛﹗ 唔知呢D人渣嚟咗呢度幾耐﹐不過佢想比人當正常人嘅話最好就守下規舉喇﹗呢度唔興排排下呢條隊又走去第二條第三條﹐係咁轉線﹔又或者叫晒自己全家一人排一條隊﹐邊個嗰條最快就喺個位大叫﹐叫成家推晒D野去嗰條隊咁樣慳時間架﹐我初初嚟嘅時候都試過咁樣做﹐比個朋友叫我唔好咁﹐因為會比人鬧。我當時覺得乜D人咁戇居架﹐但係呢度係人哋嘅地方吖嘛﹐守人哋嘅規舉係應該。習慣咗其實覺得無乜問題。去得grocery Read more [...]